29 сәуір 2015 ж, 09:41

V «БАЙҚОҢЫР» ИНВЕСТИЦИЯЛЫҚ ФОРУМЫ

28-29.04.2015 жылы «Қызылорда облысының жаңа инвестициялық стратегиясы» тақырыбында V «Байқоңыр» инвестициялық форумы өтті. Форум қатысушылары Байқоңыр қаласындағы мұражайды аралап көріп, «Союз» зымыран тасығышының ұшырылу сәтін тамашалады. Жұлдызды қалашықтағы бұл шараны әр жарты жыл сайын ұйымдастыру дәстүрге айналып келеді. Осы форумда 400-ден аса отандық және алыс-жақын 12 шет мемлекеттен туристік сала өкілдері, ұлттық компания, ғылыми-зерттеу, дамыту институттары мен банк секторлары және мемлекеттік орган өкілдері аймақтың инвестициялық мүмкіндігін бағамдау үшін бас қосты. Ауқымды жиынға Қызылорда облысының әкімі Қырымбек Көшербаев, ҚР Индустрия және даму министрлігі туризм индустриясы департаментінің директоры Тимур Дүйсенғалиев, «Бәйтерек» ҰБХ» басқарма төрағасы Қуандық Бішімбаев пен еліміздің және шетел инвесторлары, кәсіпкерлері, қаржылық сектор өкілдері қатысты.Басқосуда сөз алған облыс әкімі Қырымбек Көшербаев туризмді дамыту кез-келген аймақтың экономикалық ахуалын жақсартатыны сөзсіз дей келе, барлық форум қонақтарын өңірдегі туризмді дамытуға шақырды. «Жергілікті билік инвесторлардың Қызылорда облысында жұмыс істеуіне барлық жағдай жасауға дайын»,- деді аймақ басшысы.

«Қызылорда облысының жаңа инвестициялық стратегиясы» тақырыбында V «Байқоңыр» инвестициялық форумның пленарлық мәжілісі өтті. Бұл басқосу Қызылорда облысының экономикасына отандық және шетелдік инвестициялар тарту арқылы индустриалды, туристік және аграрлық салаларды дамытуды көздейді.

Жиынға Қызылорда облысының әкімі Қырымбек Көшербаев, ҚР Индустрия және жаңа технологиялар министрінің орынбасары Альберт Рау, «Бәйтерек» ҰБХ» басқарма төрағасы Қуандық Бішімбаев, ЕҚҚДБ-ның Қазақстандағы өкілдігінің директоры Джанет Хэкман, Ресейдің білікті ғалымы, экономика ғылымдарының докторы, профессор Абел Аганбегян мен отандық және шетел инвесторлары, кәсіпкерлер қатысты. Бұл жолғы форумға әлемнің 19 мемлекетінен қаржы институтары, бизнес өкілдері келді.

Алдымен аймақ басшысы Қырымбек Көшербаев осыған дейін өткізілген төрт форумның нәтижесін айтып, өңірдің әлеуметтік-экономикалық жағдайына тоқталды.

- Ғарыш айлығында болып, зымыранның қалай ұшқанын тамашалап, түркітілдес елдердің тәу ететін Қорқыт ата мемориалды кешенін көрдіңіздер. Бұл туристік артықшылықтарымыз. Бұған дейінгі форумдардың нәтижесі жаман емес. Инвесторлардың барлығы өңірге ағылмағанымен, аймақтың артықшылықтарына көз жеткізгендер келе бастады. Бізбен әріптестік байланыста жұмыс жасап жатқандардың қатары артты, - деді облыс әкімі Қ.Көшербаев.

Жалпы, Сыр өңірі инвесторлар үшін қолайлы аймақ. Өткен жылы құрылысы аяқталған «Бейнеу-Бозой-Шымкент» магистралдың және «Батыс Еуропа – Батыс Қытай» автодәліздің бойында облыс халқының 93 пайыз тұрғыны тұрады. Тоғыз жолдың торабындағы аймақта инвесторлар үшін бар жағдай жасалған.

ҚР Индустрия және жаңа технологиялар министрінің орынбасары Альберт Рау индустриаландыру бағдарламасының орындалуына тоқталды.

– Осыдан 5-6 жыл бұрынғы жағдаймен қазіргіні салыстыруға болмайды. Бағдарламаның бірінші бес жылдығы дағдарысқа сәйкес келгенімен, нәтижелі жүзеге асты. Қызылорда металлургия саласын дамытуды қолға алып отыр. Бұл бағыттағы жұмыстарға кірісіп те кетті. Өңірде өндірісті өркендетуге мүмкіндік мол. Мұнда жер асты қазба байлықтары да жеткілікті, - деді Альберт Рау.

Қызылорда облысы Еуропалық қайта құру және Даму банкімен (ЕҚҚДБ) жалпы құны 63 миллиард теңгені құрайтын 8 жобаны жүзеге асыруда. Бұл бағыттағы жұмыстардың алдағы уақытта да жалғасатынын ЕҚҚДБ-ның Қазақстандағы өкілдігінің директоры Джанет Хэкман атап өтті.

Ал Ресейдің білікті ғалымы, экономика ғылымдарының докторы, профессор Абел Аганбегян Қызылорда облысының даму қарқыны таңғалдырғанын айтты.

– Өз басым 30-40 жылда біраз мемлекетте стратегиялық даму жоспарын жасаумен айналыстым. Соның ішінде Қызылорда облысын ерекше атағым келеді. Үш жыл бұрын облыс республикада 16 аймақтың соңында тұрды. Содан білекті түріп іске кірістік. Жергілікті билікке риза болғаным барлығы бұған мүдделі екендіктерін аңғартты. Мағанда жұмыс жасауға ыңғайлы болды. Нәтижесін көріп отырсыздар. Қазір аймақ үздік үштікте. Әлеуемттік салаға қаржы бөлу жөнінен алдыңғы орында. Соңғы екі жылда 200-ге жуық әлеуметтік нысан салынды. Шынын айтайын, бұл бағыт-бағдарды айқындап алғанның арқасы. Өз тәжірибемде аз уақыттың ішінде мұндай нәтиже көрсеткен бірде-бір аймақ болған емес, - деді Абел Аганбегян.

Осы форумға дейін 49 меморандумға қол қойылған болатын. Ал V Байқоңыр инвестициялық форумында тағы 10-ға жуық келісім шарт жасалды. Бұл құжаттың барлығы өңірге инвестиция тарту, туризимді дамытуға мүмкіндік береді.

«Байқоңыр» V-Инвестициялық форумның «Қызылорда облысының металлургия кластерін дамытудың перспективалары мен ерекшеліктері» секциясы аясында, ҚР инвестициялар және даму Вице-министрінің, Қызылорда облысы әкімінің орынбасарының, мемлекеттік органдардың басшыларының, шетелдік және отандық бизнес - қауымдастықтары өкілдерінің және т.б. мүдделі тұлғалардың қатысуымен Қызылорда облысында тау кен - металлургия кешенінің дамуының перспективалары қаралған болатын.

Секцияның жұмысы барысында аймақтың қатты пайдалы қазбаларды өндіру перспективалары мен оларды кешенді пайдалану мүмкіндіктері, республикалық бюджеттен бөлінген қаржы арқылы жүргізілген іздестіру жұмыстары және инвестициялық жобаларды мемлекет тарапынан қолдау туралы мәлімет берілген болатын. Сонымен қатар, «Шалкия Цинк ЛТД» ЖШС-нің және «Байқоңыр (Байконур)» ӘКК» ҰК» АК-нің басшылары Қызылорда облысында Шалқия кенішін кеңейтіп, кен байыту фабрикасын салу және ферроқорытпа зауытын салу жобаларының іске асырылуының қазіргі жағдайымен таныстырды.

Секция жұмысына қатысқан әлеуетті инвесторлар, тау кен - металлургия саласында, бірінші кезекте, жоғары сатылы өндеу өндірістерін құруға бағытталған инвестициялық жобалардын жүзеге асырылуының мүмкіндіктері мен перспективаларына қызығушылық танытты.